TLAMACHTILIZTLAHTOLZAZANILLI IN TETLANEXTILIZTLI („LA LEYENDA DEL SEXTO SOL“)

 
 
 
 
 
 
In yuh compohuah in huehuetque,
in yeh hueucauh
in teteoh mononotzque
ompa Tamoanchan.
 
Quihtoque:
„Itech monequi
in xihuitl pohualozque“.
 
Oquichixque
nezcayotl ilhuicapan
auh niman ic quiyocoxque
in xiuhpohualli.
Quihtoque:
„Axcan, in ic ce xihuitl
inin xiuhpohualli
itoca ce tecpatl“
(3721 años a. C.).
 
Quihtoque:
„Itech monequi quizaz
ompohualli ihuan matlactli omome
xiuhmolpilli achto in tic yocoyazque
in ic ce tonatiuh“.
Yeceh, in oyuh
in ic ompohualli ihuan chiconahui xiuhmolpilli,
oacico in quetzalocelotl
quintlapalotito in teteoh ompa
Tamoanachan.
Oquimmilhui:
„Notecuyohuané,
citlalpopoca oquiz
itech huey cicitlalmixtli.
Axcan monequi pehuaz
in inic ce tonatiuh“.
Auh in teteoh quinanquililique:
„Ca yeh cualli tlazoquetzalocelotlé.
Ma pehuaz in inic ce tonatiuh“.
 
Inin omochiuh ce tecpatl
xihuitl, in oyuh in ic
ompohualli ihuan chiconahui xiuhmolpilli,
quihtoznequi ipan in xihuitl 2548
in toxiuhpohual
(1173 años a. C.).
 
Auh in yuh oquihtotihui in huehuetque
inin ic ce tonatiuh itoca nahui ocelotl,
in ocatca matlactli omei xiuhmolpilli
(676 años), auh omanca itech in xihuitl 2548
ixquich in xihuitl 3224 in toxiuhpohual
(1173 – 497 años a. C.).
Inique in onocah, ocelocualloque.
Zan no yeh inic tlamito
inic popoliuhque.
 
 
Niman ic,
oquiz in ic ome tonatiuh
itoca nahui ehecatl,
in ocatca chicome xiuhmolpilli
(364 años), auh omanca itech in xihuitl 3224
ixquich in xihuitl 3588 in toxiuhpohual

(497 – 133 años a. C.)

Inic poliuhque ehecatocoque,
auh inxiuh catca ce tecpatl.
 
 
Niman ic,
oquiz in ic yei tonatiuh
itoca nahui quiyahuitl,
in ocatca chicuace xiuhmolpilli
(312 años), auh omanca itech in xihuitl 3588
ixquich in xihuitl 3900 in toxiuhpohual

(133 a. C – 180 años d. C.)

Inic poliuhque
tlequiyahuiloque
auh no tlatlac in tonatiuh
mochi tlatlac in incal,
auh inxiuh ce tecpatl.
 
 
Niman ic,
oquiz in ic nahui tonatiuh
itoca nahui atl,
in ocatca matlactli omei xiuhmolpilli
(676 años), auh omanca itech in xihuitl 3900
ixquich in xihuitl 4576 in toxiuhpohual

(180 – 856 años d. C.).

Inic popoliuhque
apachiuhque
hualpachiuh in ilhuicatl
zan cemilhuitl in poliuhque.
 
 
Niman ic,
oquiz in ic macuilli tonatiuh
itoca nahui ollin,
in ocatca matlactli omei xiuhmolpilli
(676 años), auh omanca itech in xihuitl 4576
ixquich in xihuitl 5252 in toxiuhpohual

(856- 1532 años d. C.).

Auh in ipan
omotlacatili in Topiltzin
in Ce Acatl Quetzalcoatzin.
 
Auh no omochiuh
huallaliztli in caxtiltecah.
 
Xihuitl 3 calli (xihuitl 5241
in toxiuhpohual, 1521 años d. C.)
in tonatiuh nahui ollin omotlatilitito,
auh in huey tlahtoani,
in Cuahtemoctzin, oquimitalhui:
„Axcan onpolihui totonal,
ihcuac hualmohuicaz tetlanextiliztli,
occepa in tlahui totonal“,
auh xihuitl 1 tecpatl, xihuitl 5252
in toxiuhpohual (1532 años d. C.)
in ic macuilli tonatiuh nahui ollin ocempolihui.
 
Niman ic, omocentlalique
nahuintin tlamatinime,
nahuintin huehuetque
in ihuicpa nahui huey altepeme,
auh mononotzque oztotitic
ompa Xaxahuenco.
Ce tlamatini Cuauhtitlan chane,
ce tlamatini Azcapotzalco chane,
ce tlamatini Itztapallapan chane,
ce tlamatini Malacateticpac chane.
Cenca ic tlaocoxque auh
oquintlatlauhtiayah in teteoh.
Quihtoque:
„Teteohé, totecuyohuané:
¿Campa tiyazque?
¿Tle ticchihuazque?
¿Cuix tlacazo antechcahuilique?
¿Cuix tlacazo tonpolitihui?“
Niman quinnanquililique in teteoh:
„Topilhuané,
Cuauhtitlan chanehé,
Azcapotzalco chanehé,
Itztapallapan chanehé
Malacateticpac chanehé:
Macahmo xitlaocoxcan.
¿Cuix ahmo amehuan
inpiltzitzihuan in cuauhtli, in ocelotl ?
¿Cuix ahmo amehuan
in inxocoyohuan ?
Ma xiquilnamiquican
in tlahtolli in Cuauhtemoctzin,
yeh oquimihtalhui
‚ totlatqui topan
yuhquin huey chalchihuitl‘. 
Tla xicmocaquitican
topiltzihuané:
Axcan pehua in cahuitl in yohualli.
In oc in cahuitl in yohualli maniz nican Anahuac,
itech monequi amotlatilizque.
Chiconahui xiuhmolpilli
mocahuaz in cahuitl in yohualli.
In chiconahui yohualteteuctin,
teteuctin in chiconahui xiuhmolpilli yezque.
¿Cuix huel oanquicacque?
In ic ce yohualxiuhmolpilli,
Xiuhtecuhtli iyohualxiuhmolpil.
In ic ome yohualxiuhmolpilli,
Itztli iyohualxiuhmolpil.
In ic yei yohualxiuhmolpilli,
Piltzintecuhtli iyohualxiuhmolpil.
In ic nahui yohualxiuhmolpilli,
Centeotl iyohualxiuhmolpil.
In ic macuilli yohualxiuhmolpilli,
Mictlantecuhtli iyohualxiuhmolpil.
In ic chicuace yohualxiuhmolpilli,
Chalchiuhtlicue iyohualxiuhmolpil.
In ic chicome yohualxiuhmolpilli,
Tlazolteotl iyohualxiuhmolpil.
In ic chicuei yohualxiuhmolpilli,
Tepeyollohtli iyohualxiuhmolpil.
In ic chiconahui yohualxiuhmolpilli,
Tlaloc iyohualxiuhmolpil.
Ihcuac tlamiz in ic chiconahui yohualxiuhmolpilli,
hualmohuicaz in tetlanextiliztli,
ic onpehuaz in chicuace totonatiuh
auh amechtlahuililiquiuh“.
 
Niman ic, quihtoque in nahuintin tlamatinime:
„Ca yeh cualli teteohé. Ma in yuh yez“.
 
Niman omochiuh
in ic ce yohualxiuhmolpilli
itoca Xiuhtecuhtli iyohualxiuhmolpil,
in ocatca ce xiuhmolpilli
(52 años), auh omanca itech in xihuitl 5252
ixquich in xihuitl 5304 in toxiuhpohual
(1532- 1584 años d. C.)
Auh in Huanitzin
cualli yaoquizqui. 
 
Niman omochiuh
in ic ome yohualxiuhmolpilli
itoca Itztli iyohualxiuhmolpil,
in ocatca ce xiuhmolpilli
(52 años), auh omanca itech in xihuitl 5304
ixquich in xihuitl 5356 in toxiuhpohual

(1584- 1636 años d. C.)

Auh in Tezozomoc ihuan
in Cuauhtlehuanitzin
huey tlamatinime. 
 
Niman omochiuh
in ic yei yohualxiuhmolpilli
itoca Piltzintecuhtli iyohualxiuhmolpil,
in ocatca ce xiuhmolpilli
(52 años), auh omanca itech in xihuitl 5356
ixquich in xihuitl 5408 in toxiuhpohual
(1636 – 1688 años d. C.)
Auh in cihuapilli in tepetl
huey cihuatlamatini.
 
Niman omochiuh
in ic nahui yohualxiuhmolpilli
itoca Centeotl iyohualxiuhmolpil,
in ocatca ce xiuhmolpilli
(52 años), auh omanca itech in xihuitl 5408
ixquich in xihuitl 5460 in toxiuhpohual
(1688 – 1740 años d. C.)
Auh in amequehmeh
huey tlamatinime. 

 

Niman omochiuh
in ic macuilli yohualxiuhmolpilli
itoca Mictlantecuhtli iyohualxiuhmolpil,
in ocatca ce xiuhmolpilli
(52 años), auh omanca itech in xihuitl 5460
ixquich in xihuitl 5512 in toxiuhpohual
(1740 – 1792 años d. C.).
Auh in huey cuauhxicalli
otechtlapaloco Tenochtitlan,
ihuan in Huitzitzilin Cocoxtli
huey tlamatini. 
 
Niman omochiuh
in ic chicuace yohualxiuhmolpilli
itoca Chalchiuhtlicue iyohualxiuhmolpil,
in ocatca ce xiuhmolpilli
(52 años), auh omanca itech in xihuitl 5512
ixquich in xihuitl 5564 in toxiuhpohual
(1792 – 1844 años d. C.)
Auh in tepetlan chane
cualli yaoquizqui.
 
Niman omochiuh
in ic chicome yohualxiuhmolpilli
itoca Tlazolteotl iyohualxiuhmolpil,
in ocatca ce xiuhmolpilli
(52 años), auh omanca itech in xihuitl 5564
ixquich in xihuitl 5616 in toxiuhpohual
(1844- 1896 años d. C.)
Auh in ipan, miec in yaoyotl.
In tzapotecatl cenca oteyaochihualoc.
Auh in mazatecatl
huey tlamatini.
 
Niman omochiuh
in ic chicuei yohualxiuhmolpilli
itoca Tepeyollohtli iyohualxiuhmolpil,
in ocatca ce xiuhmolpilli
(52 años), auh omanca itech in xihuitl 5616
ixquich in xihuitl 5668 in toxiuhpohual
(1896 – 1948 años d. C.)
Auh in ipan, miec in yaoyotl,
ihuan in anenecuilcatl 
huey tlamatini. 
 
Niman omochiuh
in ic chiconahui yohualxiuhmolpilli
itoca Tlaloc iyohualxiuhmolpil,
in ocatca ce xiuhmolpilli
(52 años), auh omanca itech in xihuitl 5668
ixquich in xihuitl 5720 in toxiuhpohual
(1948 – 2000 años d. C.)
In ipan Cuauhtemoctzin
otechmomaquili nezcayotl
ompa Ichcateopan,
inic tlamiz in cahuitl in yohualli.
Mixtemi tlapcopa motlamachitito
auh in temachticatzitzin in calpoltin
huey tlamatinime.
 
Niman ic, otlanque
in chiconahui yohualxiuhmolpilli
auh opahpacque in cuauhtli, in ocelotl.
 
Yeh ic ohuallauh in yancuic tonatiuh.
 
Inin ic ce chicuace tonatiuh
itoca tetlanextiliztli,
inin yeh tehuantin totonatiuh
in tonnemih axcan.
 
Itonal, nahui cuauhtli.
  
Auh tlamacehuacoh in tlamatinime
ompa Xaxahuenco
quintlazohcamachililizque in teteoh.
Quihtoque:
„Teteohé, totecuyohuané, tachtohuané,
cenca tamechtlazohcamachililiah.
Cueponqui in acoquizaliztli
in ic chicuace tonatiuh,
in tetlanextiliztli.
Teteohé:
¿Iquin maniz totonatiuh?
¿Azo ce xiuhmolpilli?
¿Azo matlactli omei xiuhmolpilli?
¿Azo in quexquichcauh maniz cemanahuatl?“.
Niman quihtoque in teteoh:
„Tlamatinimehé, topilhuané,
tla xonahuican ic omonexti
in ic chicuace tonatiuh,
in tetlanextiliztli.
Inin yancuic totonatiuh maniz
in quexquichcauh nemiz totlahtoltzin
in huey toquetzaltzin
in nahuallahtolli.
Intla miquiz totlahtol,
onpolihuiz inin yancuic totonatiuh.
¿Cuix huel anquicacque
topilhuané?“.
Niman quinnanquililique
in tlamatinime:
„Huel oticcacque teteohé.
In huey chalchihuitl,
in nahuallahtolli,
aic ilcahualoz“.
 
Auh quin ihcuac,
in tetlanextiliztli 
mahuiztic quintlahuililitica
intlatqui in toltecah
intlatqui in tepanecah
intlatqui in mexihcah
ihuan intlatqui
in ixquich chichimecah.
 
 
 
 
 
 
 
 
 
 
 
Advertisements
Dieser Beitrag wurde unter Nahuatl veröffentlicht. Setze ein Lesezeichen auf den Permalink.